Kayaria

Nokon janeriki Jane Shirley Mori Cairuna eara shipibo konibo ainbo iki. Eara Santa Rosa de Aguaytiainoax pikota iki, jatian ea ania iki  Jepe Ian- Inoax -mai oshin, jainribiriki en kirika akin keyoa, secundariakaman. Jainxon en kirika aka iki Universidad Nacional Intercultural de la Amazoníain, jain ea axea iki jaskatax main teti itanribi mesko jiwinbaon teti, jaskaribi mesko non yapabaon tete. Onan wirakochabaon ea axeakana iki neskara mesko tebo ati.

Ramara rabe oxe iki ea ALIANZA ARKANA bobetan teti itai, enra tebo akai mesko Jemankonia nomabobetan  chiponkiabobetan itanribi rebokiabo bobetan. Earibira teti itai non joibo jato ninkamai mesko jeman jakoma jawekibo winoti itaibo wetsatian noa onamashoko iketian noa mai, paranxonbo  bichinkanai, non apon akai noa ninkayamakin jaskarakopi riki ea neskara jawekibo oini  itan wetsa jonibobetanribi mesko jemankoniabo koshi bobetan moa paxkina ikax non joi jato ninkamai moa niibo keyotaintian.

Noara ibake kai ONG ALIANZA ARKANA bobetan kayaria gemanko kai   wetsa baritia, diciembre oxe 03 neten, rabe waranka sokota baritian, jawekeskaki jain noa jonibo jaton jiwin tetai ixon onankasi, jaskaribiakin non onankasai riki jawekeskaaxonki jaton niibo koirankanai ixon .Noara katainbake jakoinrakin jaton niibo koirakanai ninkatax. Nato jeman neskara tebo abeirankaken jaton jiwibo keyotimakopi. Jainoa jonibo onan shamanax jaton jiwin tete ikanai itan ribi jaskati teti soron maxkayamakanai jaton bakebo itan ribi jaton awin xobonco piti maxkatimakopi.

Nato  kayaria riki chiponkia jema, aniorama, jainra jake quimisha pacha jonires. Noara ibake nokoti nato jemanko, mai oshin noax ishton motoronin kax, paronbi kax riki kayaria weaman jikiti.

Nato jemanko kamatianbira, non ninkata iki neskara tebo akanai, jatian non shinana iki neskaribiakin wetsa jemanbo ati, jaskaxon Certificación Forestal Voluntaria bitikopi, mesko jakon jiwibo ocho itan kopichabo marotikopi jaskaribi neskara kirikabo biax jaton jiwin maroti atinpankake rinkobaon jemanko. Neskara shaman noa tetaitian tsonbi noa jiwibo keyonanrestimaiki.

Jain noa nokoketianra ibake jatibi jonibo tshinkiti, jatian noa jatobetan tsinkibake yoyo inox. Ja tsinkitiainra ibake nobe axeamis Eli Sánchez, ja axeamis iki nobe Alianza Arkanain tetai itan ribi ja iki kayariaenoa joni ,Alianza Arkanain jan oinai jaskaxon bakebo axeati te atibo. Ja axeamisnin jonibo yoibake jawe akishama rinkobobetan bokanarin ja jemanko ixon.

Alfredo Rojas riki  kayariain jaskatax jiwin teti jato axeai joni, jaskaribi ja iki jaskoxon jatibi jiwin tetibo jato ikinai. Ja jonin noa iweibake wetsa jonibobetan jain ja icha nii itan jiwibo koirankanainko, jainxon noa jakonshamankin noa yoyoibake jaskaxon mesko tebo jatibi jonibobetan akanaibo.Jabaon jiwibo aresbireskin xateyamakanai, jiwi rastekaskin jatixonbin shinanxon akanai senenshamanres jiwibo keyonaketian .Jaskarakopi kayaria jema icha jiwijapari iki ramakamanbi.

Noa jabe yoyo iketianra ibake mesko shinanbo pikoti.

  • Alfredo Rojas ninra noa yoibake nato bariatianra non jiwi tsekayamake akin, apon bena joibo pikoa iki aresbereskin jiwi xatetima Regente Forestal akanai joninpari noa akina iti jake mesko kirikabo, jaki chipotax jiwin teti. Neskara onan jonibaonra onanke jaskaxonshaman neskera tebo ati. Neskera joniyameketianriki nato baritian kayaria-noa jonibaon nato baritian jiwi xateyamakana. Jiwin teti kirika noa menekanaironki iki pichika baritiakamanres iti. Neskera kopibo riki nato baritian jiwin teyamakana, jatian nenoa jonibo pitin ikanke jainoaxribi mesko jawekininbo yorankanke.
  • Jakon-ira riki neskarashaman jawekibo, non kaibobaon jatonbi akai, neska akin jiwibo koiranxon bikanti atipankake mesko jonibaon korikini jato akintibo. Westiora papan noa yoibake jaronki iki rabe bakeya universidadain kiriya akai jaronki ja papan jiwi xatexon akinai ja maxkatabo bixonkin, jan piti itanribi jaen oxati kopiati itanribi wetsa jawekibo kirika aki maxkatabo kopiati. Jaskaribi jainoa jonibaon xobo ati jiwin kenkin jainoa bikanai, nato jiwibo: texo wita (quinilla) ,axo (capirona), ana(catahua) jainoax wetsa jiwiboribi.

                                             Axo (Capirona)

  • Kikin jakoinra riki nato gemanko akanai, ja oinxo oinariki wetsa gemanko akanai jaton nii menekin nato wirakocha korikiabo jabon akai  ichamashoco kopiakin non kaibobo jaton mainko jiwi tsekatikopi wetsatian akanai arisberesken jiwi xatereskankin itanribi jakopira rama akai non oinki rama non niibo  keyoti itai ,rama iki moa ikatikeskama. Jaskara ikitianriki riki nato jema kayaria akanai koiraxon jaton nii jakoaxonshaman temakin jawen  yonrontimakopi jaton xobonko. 

Neskara jakon jawekibo akanaitianra earibi nato ong Alianza Arkanabobetan tekin jaskara jawekibo non aniakin shinanai, neskakin jaweki atibo. Jastax non kaibobo jaton jiwibaon jakonax tetikopi. Jaskarakopibora wetsa jemanko boribi neskera te peoti jake aresberenkin non jiwibo keyotimakopibo. Jaskati non kaibobetan jiwin tekin non shinanti jake jaskatishaman kayaria jonibo wijin tekanai, jaskatiribi noa tekantikopi.

                                  Alianza Arkanain tetaibo

 

 

 

 

 

 

 

Leave a Reply

Your email address will not be published. Required fields are marked *